Басты Жаңалықтар Францияның солтүстігін су басты

Францияның солтүстігін су басты

11.11.2023 17:21

Францияда су тасқынымен күрес жалғасып жатыр. Елдің солтүстігінде 100-ден астам елді мекеннің халқын көшіруге тура келген. Аймақты жағдайға толығырақ Арыстан Рысбек тоқталады.

Францияның солтүстігінде төпелеп жауған жаңбыр осы аптада алапат тасқынға ұласты. Одан егістік алқаптары шайылып, талай мал қырылған. Әсіресе, Па-де-Кале аймағындағы жағдай қиын. Мұнда өзендер арнасынан тасып, үйлер суға кетіп, 100-ден астам елді мекеннің халқын көшіруге тура келген.

Гаетан Гуче, 32 жастағы фермер:

Бүгінгі жағдай бойынша біз бес күн бойы су тасқынына қатысты қызыл түсті ескерту режимінде өмір сүріп жатыр. Көп шығынға ұшырадық. Тауықтар қырылып қалды, тұқым бүлінді, құрал-жабдықтар жоғалды. Жағдай өте қиын».

Қазір Францияның теріскейіндегі қалалар мен ауылдардың көшелері өзен-көлдерді еске салады. Жолдар жабық, мектептер қызметін тоқтатқан және сан мың үй жарықсыз отыр. Көп адам көмекке мұқтаж.

Жан-Марк Джойез, тракторшы:

Біз күнде таңертеңгі сағат 6-да адамдарды жұбату үшін жолға шығамыз, қажет болса көмектесеміз. Бәрі жақсы болғанын қалаймыз. Соған көз жеткізбей үйге кетпейміз.

Француз үкіметі ондаған қаланы табиғи апат жағдайындағы елді мекендер деп жариялады. Мұндай шешім үйлері мен бизнесінен айрылған тұрғындар үшін шығындарды сақтандыру компаниялары арқылы қалпына келтіруді жеңілдету мақсатында қабылданған.

Арыстан РЫСБЕК

Автор

Арыстан Рысбек

Бөлісу