Израиль әскері Газаны толық қоршауға алды

Израиль жауынгерлері мен танкілері Газа қаласын толық қоршауға алды. Олар осы секторды екіге бөлгендерін жариялап отыр. Бұған қоса, Израиль армиясы солтүстік Газа мен Газа шаһарының тұрғындарын оңтүстікке көшіру үшін «өткізу дәлізін» ашқандарын хабарлады. Әзірге Израиль қарулы күштерінің Газаға қашан кіретіні белгісіз. Болжамдарға қарағанда, бұл операция алдағы 48 сағатта басталуы мүмкін.

Ал Израильдің авиациялық соққыларынан қаза тапқан палестиналықтардың саны 9700-ге жетті. Сол құрбандардың 4 мыңнан астамы – бала.

Таяу Шығыста жаңа соғыс қазанның 7-де хамастықтар Израильдің оңтүстік қалаларына шабуыл жасап, 1400 адамды мерт қылғаннан кейін басталды.

Арыстан Рысбек