АҚШ-та мылтықты жартылай автоматқа айналдыруға тыйым салынды

АҚШ-та мылтықты жартылай автоматқа айналдыруға тыйым салынды. Ақ үйдің ұсынысын Жоғарғы сот қолдап шықты. Қару жарақ шығаратын компанияның жұмысына шектеу қойылды.

Жалғас Сәдібекұлы, тілші:

АҚШ-та қару-жарақ бөлшектері еркін сатылады. Бұл сайып келгенде әуесқойларға қарапайым мылтықты,жартылай автоматқа айналдыруға мүмкіндік беріп отыр. Енді бұған тыйым салынбақ. Ел билігі қару-жарақ бөлшектерін шығаратын компаниямен соттасып, жеңіске жетті. «Бұл бейбіт халықты қылмыскерлерден қорғау үшін қажет қадам болды», - дейді Ақ үй өкілдері.

Роланд Гутьеррес, Техас штатының сенаторы:

Отбасылар алаңдап отыр. Олардың көңілі қалып жатыр. Бұл шындық. Қаншама жарақат алған бала ем-дом алып жүр. Олар бұрынғыдай емін-еркін қорықпай жүре ала ма? Біз олардың бейбіт күнін ұрлап жатырмыз. Егер нақты бір шара қолданбасақ, сіздің де аймақта қайталануы мүмкін.

Анжела Грегг, тұрғын:

Бейбіт күнде балалар өліп жатыр. Ұлттық гвардианы көшеге күзетке қойса да, бұл сұмдықты тоқтату керек. Бізге көмек керек. Мұны тоқтату керек.

Жалғас Сәдібекұлы, тілші:

Себебі биыл сегіз айдың ішінде жарты мыңдай жаппай оқ ату оқиғасы тіркеліп, 1200-ден астам бала мен жасөспірім қаза тапты. Атыс-шабыстың құрбандары көп болғандықтан АҚШ ақпарат құралдары қазіргі жағдайды «қару эпидемиясы» деп атап жүр. Былтыр антирекорд орнаған жыл болды. 48 мыңнан астам адам оқ тиіп көз жұмды.

Жалғас Сәдібекұлы