Иракта ұлтаралық қақтығыстан 3 адам қаза тапты

Ирактың Киркук қаласында этникалық топтар қақтығысты. Соңғы мәліметке қарағанда, 3 адам қаза тауып, 14-і жараланған.

Ұлтаралық жанжалға Ирактың орталық үкіметінің әкімшілік ғимаратын Күрдістан демократиялық партиясына қайтару шешімі себепші. Алайда жергілікті түркімендер мен арабтар кезінде күрдтер билігінен қысым көргенін айтып, бұл шешімге қарсылық білдірген.

Қаладағы жағдай ушыққандықтан премьер-министр Мұхаммед әс-Судани Киркукке төтенше жағдай енгізіп, саяси партияларды, әлеуметтік ұйымдарды және қауымдастықтар лидерлерін тұрақтылықты қалпына келтіруге атсалысуға шақырды.

Арыстан Рысбек