Жаңалықтарды Telegram арнамыздан оқыңыз!Мәскеуде Чехов атындағы Халықаралық театр фестивалінің аясында «Құлагер» қойылымы сахналанды. Ғабит Мүсірепов атындағы мемлекеттік балалар мен жасөспірімдер театрының әртістері музыкалық спектаклді қазақ тілінде қойып, көрерменді тәнті етті.
Индира Бегайдар, тілші:
Саунтдрама жанрындағы қойылымды дайындауға 1 жылдан астам уақыт кеткен. Режиссер спектакльде қазақ халқының болмысын, салты мен санасын, дәстүрін Ілияс жазған поэмадан алшақтатпай сахна тілімен сомдауға тырысқан. Талғамы биік көрермен үшін жастардың тыңғылықты дайындалғанын байқауға болады.
Фархат Молдағали, режиссер:
«Құлагер» спектаклі - ұлттық фольклорға, ұлттық дәстүрге, ұлттық кодқа негізделіп қойылған спектакль. «Құлагер» спектаклін көріп, басқа сен шетелдің адамы болсаң, сен «қазақ» деген ұғымды, қазақ деген елді, қазақтың кім екенін түсініп қайтасың.
Қойылымның режиссері- «Дарын» мемлекеттік сыйлығының иегері Фархат Молдағали. Басты рөлдерді Әсет Иманғали, Лидия Каденова сынды талантты әртістер ойнайды. Спектаклдің декорациясы, музыкамен әрленуі жоғары бағаға ие болды. Қазақ әдебиетінің жауһарына айналған жарқын туындыны тамашалауға келген көрерменнің қарасы қалың.
Көрермен:
Қойылымнан алған әсерім сондай, тіпті жылап қалдым, әлі өз-өзіме келе алмай тұрмын. Осы қойылым орыс тіліне аударылмай, қазақша қойылғаны дұрыс болды деп ойлаймын. Себебі мұндай әдемілікті ана тілінде сезіну керек.
Көрермен:
Дәл осындай жоғары деңгейде қойылым көремін деп ойламадым. Әртістердің дауыстары, дене бітімі қандай керемет. Дайындықтары да өте жоғары екені көрініп тұр.
Қазақ өнерін ұлықтап жүрген талан иелері бұған дейін әлемнің бірнеше мемлекетінде өнер көрсетті. Жасөспрімдер театры келешекте «Ақ білек», «Ғасырдан да ұзақ күн» қойылымдарын сахналамақ.
Индира Бегайдар
