Жаңалықтарды Telegram арнамыздан оқыңыз!Шымкент қаласының жұртшылығы бүгін Ұлыстың ұлы күніне орай ұйымдастырылған «Дәм дәстүр» жәрмеңкесінде ұлттық тағамдардан дәм татты. Меркелік дастарханда шаһардағы 50-ге тарта мейрамхана өздерінің ең жақсы деген ас мәзірлерін ұсынды. Оның ішінде асылған еттен бастап, наурыз көже, қуырдақ, жөргем, қимай, қарын бөртпе секілді көптеген тағамдар әзірленді. Сондай-ақ кондитерлік кәсіпорындар да өз өнімдерінен дәм татқызды. Мұндай жәрмеңке Шымкентте осымен екінші рет ұйымдастырылып отыр. Шараға қатысушылар ішінен үздіктер анықталып, түрлі номинацияларға ие болды.
Аманғайша Наурызбаева, қала тұрғыны:
Мына жерден көріп риза болдым. Қазақтың дастарханының молдығын, қазақ қыздарының салт-дәстүрді ұмытпай киімдерін киіп жүргенін. Міне, біздің ұлттық дәстүріміз! Наурыз құтты болсын!
Астана Қарғабай, қала тұрғыны:
Дастарханның сәні дәмімен демекші Наурыздың бірден бір атрибутикасы ұлттық тағамдар. Ұлттық тағамдарымызды насихаттап, керемет күнде дәмнен ауыз тигізіп жатқан керемет мереке. Сол үшін барша шымкенттіктерді Наурыз мерекесімен құттықтаймын!
Ғани Қалмаханов
