Парламенттік Ассамблеяда терроризмге қарсы заң әзірлеу ұсынылды

Мәжіліс төрағасы Ерлан Қошанов бастаған делегация Ұжымдық қауіпсіздік шарты ұйымы Парламенттік Ассамблеясының кезекті отырысына қатысты. Мәскеуде өткен жиында өңірлік қауіпсіздік саласындағы ахуал талқыланды. Арменияның 2021-2022 жылдары ұйымға төрағалығының қорытындылары мен Беларусьтың алдағы төрағалығы кезіндегі басымдықтар туралы ақпарат тыңдалды. Мәжіліс спикері өңірде тұрақтылық пен қауіпсіздікке нұқсан келтіретін түрлі қауіп-қатерлер мен қақтығыстардың өзекті болып отырғанына назар аударды. Терроризммен күрес саласындағы ұлттық заңнамаларды үйлестіруге мүмкіндік беретін Ұжымдық қауіпсіздік шарты ұйымының «Терроризмге қарсы іс-қимыл туралы» жаңа модельдік заңын әзірлеуді ұсынды.

Ерлан Қошанов, ҚР Парламенті Мәжілісінің төрағасы:
Терроризм қауіпсіздік пен тұрақтылыққа үлкен қауіп төндіреді. Ол заңсыз көші-қонның, трансшекаралық қылмыстың, заңсыз қару-жарақ пен есірткі тасымалының артуына ықпал етеді. Бізге осы сын-қатерлерге бірлесіп қарсы тұрудың нақты құқықтық тетіктерін қалыптастыратын Ұжымдық қауіпсіздік шарт ұйымы елдерінің модельдік заңнамасының сапалы базасын қамтамасыз ету керек.

Индира Бегайдар