Ақтауда сарбаз әскери бөлімге қайта оралмаған

Ақтауда сарбаз жоғалды. Әскери қызметшілер мен полиция оны 1 тәуліктен бері таппай жатыр. Әділбек Бағлан - Ақтөбе қаласының тумасы. Жасы 18-де. 66-56 әскери бөлімінде әскери борышын өтеп жатқан сарбаз, маусымда ауылына қайтуы тиіс еді. Өткен сенбіде теңіз жағалауындағы қоғамдық тәртіпті бақылау үшін шыққан ол, түнде жұмысын аяқтап, сөмкесі мен арнайы құралдарын жанындағы патрульдік қызметкерлерге тапсырып, кетіп қалған. Содан бері ұшты-күйлі жоқ.

Марат Рахпанов, 6656 әскери бөлімінің командирі: 

Әділбек - әскери нарядтың бастығы еді. Қасындағы 2 сарбаз да әскерге өзімен қатар шақырылғандар. Олардың сөзінше, сарбаз әскери бөлімге қайтқысы келмейтінін айтқан. Мұндай қадамға баруына не түрткі болғанын анықтаймыз. Жалпы осындай жағдайда қылмыстық жауапкершілік қарастырылмаған. Қызметтік тергеу жүргізіліп, әкімшілік немесе тәртіптік жаза берілуі мүмкін.