Петропавл әуежайы 2 рет аукционға шығарылып, сатып алушы табылмады

Петропавл халықаралық әуежайы екі рет аукционға шығарылып, сатып алушы табылмады. Бұған дейін нысанның мүлкі 5,6 млрд теңгеге бағаланған еді. Екі ай бойы жаңа иесін таппаған әуежайдың бағасы – 2,8 млрд теңгеге дейін төмендетілді. Нысанды сатып алушы 10 жыл бойы әуежайды өзгертпей, жолаушылар тасымалын қамтамасыз етуі шарт. Алайда аукционға қатысуға ешкім ниет білдірмеген. Нысан 6 жыл бұрын күрделі жөндеуден өткен. Бұл мақсатқа 7 млрд теңге жұмсалды. Әуежай әзірге жұмыс істеп тұр. Жолаушылар ұшағы Нұр-Сұлтан және Алматы қалаларына қатынайды.

Мирхат Әбілмәжінов, жолаушылар көлігі және автомобиль жолдары басқармасы басшысының орынбасары:

Сараптама әуежайдың шығынмен жұмыс істеп тұрғанын көрсетті. Мемлекеттік орган оған қаржы бөле алмайды. Сондықтан оны коммуналдық меншіктен жекенің қолына беру жөнінде шешім қабылданды. Әуежайды аукционға шығарудағы мақсат - алдымен нысанды сенімді басқаруға беріп, кейін сату.