Жаңалықтарды Telegram арнамыздан оқыңыз!Одессаға демалуға барып, үрейленіп қайтқан отбасы 6 күн дегенде елге әзер жетті. Атыстан қашқан жұрт Львов қаласына ағылған. Пойызға билет табылмай, жолаушыларды үсті-үстіне бастырмалатып мінгестіруге тура келген. Солардың қатарында көкшетаулық ерлі-зайыпты да бар. Виталий мен Анна Карнашаускас талай трагедияға куә болғанын айтады.
Виталий Карнашаускас, Көкшетау қаласының тұрғыны:
40 шақырымдай кептеліс болды. Львов пен Польша арасындағы көрініс жан аярлық. Бір қатарда жеңіл көліктер тізілген. Автобустар іркес-тіркес. Тағы бір жолақта босқындар кетіп барады. Әйелдер балаларын омырауына қапсырып алған. Күйеулері жерін қорғап қалды. Біз бәрін автобустан көріп отырдық. Жол бойы жергілікті халық ас-суын, жылы-жұмсағын ұсынып жатыр. Польша шекарасына дейін негізі 130 шақырым. Бірақ, біз 2 тәулік жүрдік.
Осылайша олар Одессадан Львовқа пойызбен жетіп алды. Одан Катовицеге дейін автобуспен барған. Сөйтіп Елордаға ұшып келген.
Анна Карнашаускас, Көкшетау қаласының тұрғыны:
Өте қорқынышты болды. Қорқыныштан басым айналып екі тәулік бойы құса бердім. Ұйықтау да мүмкін емес. Әлі күнге дейін не істеп, не қойып жүргенімді ұқпаймын. Көшеде жедел жәрдем келе жатса үрейленемін.
