Атырауда медбике 100 мың теңгеге жалған екпе құжатын сатқан

Оралда алаяқ әйел инфекциялық ауруханаға жұмысқа орналастырамын деп ондаған адамды алдап соққан. Жалған қызмет үшін жұрттан 150 мыңнан 400 мың теңгеге дейін ақы алған. Тұрғындар сол үшін қарызданып, тіпті несие алған. Санитар болам деушілерді оқытып, сертификат та берген. Бірақ күнін созбалап, ақыры хабарсыз кеткен. Ақыры 30 жастағы алаяқ әйел ұсталды.

Мөлдір Садырғалиева, облыстық полиция департаменті баспасөз қызметінің жетекші маманы:

Облыстың 30-дан астам тұрғынын жұмысқа тұрғызуға уәде беріп, онымен уәдесін орындамаған 1991 жылғы туған азаматша ұсталды. Қазіргі таңда Қылмыстық кодекстің 190-бабына сәйкес тергеп-тексеру амалдары жүргізілуде.

Ал Атырауда медбике 100 мың теңгеге жалған екпе құжатын сатқан. Қазір қалалық емхананың 28 және 32 жастағы қызметкерлері ұсталды. Оның бірі базаға жалған ақпарат енгізіп, екіншісі екпе дозасын төгіп тастап отырған. Екеуіне қатысты сотқа дейінгі тергеу амалы басталды.

Ардақ Мұратқызы