Жаңалықтарды Telegram арнамыздан оқыңыз!Мұзбалақ ақын Мұқағалидың жырлары түркі тілдеріне аударылып, кітап болып басылып шықты. Жаңа жинақтың тұсаукесер рәсімі Түркияның Кастамону қаласында Түрксой халықаралық ұйымының мұрындық болуымен өтті. Ақынның 90 жылдық мерейтойына орай өткен игі шараға Қазақстаннан арнайы шақырылған ақынның ұлы мен жерлестері да қатысты. Анадолу жерінде ұйымдастырылған жиын туралы әріптесім Айдос Әшімұлының материалында.
Жеті тілде жарық көрген жинақтың тұсаукесер рәсімі Түркияның Кастамону қаласында өтуі тегін емес. Бұл шағын шаһар біздің Түркістан сияқты 2018 жылы түркі елдерінің мәдени астанасы болып таңдалған. Мұқағалиді түрікше сөйлеткен Кенан Чарбоғаның айтуынша ақынның өлеңдерін аудару оңай болмаған. Сезімтал шайырдың ішкі ойын дөп жеткізу үшін оны терең түсіну қажет дейді.
Кенан Чарбоға, ақын-аудармашы:
Мұқағали шығармалары Түркияда аса танымал емес еді. Мен осыдан 5-6 жыл бұрын ғана оның өлеңдерін алғаш рет оқыдым. Осыдан кейін Мұқағалиды түрік оқырманымен таныстыру қажеттігін түсіндім. Оның өлеңдерінде махаббат та, дерт те, Отан да бар. Сондықтан да Мұқағалидың өлеңдері ерекше.
Түркияға арнайы шақырылған ақынның ұлы мен келіні осы шараға мұрындық болған Кастамону қаласының әкіміне ақын атындағы төсбелгі тағып, ризашылықтарын білдірді. Өз кезегінде Қазақстаннан келген қонақтарға да бауырлас елдің атынан сый-сияпаттар жасалды.
Жұлдыз Мақатаев, М.Мақатаевтың ұлы:
Аудармаларды қарадық. Соның ішінде бұрынғы Совет одағының түркі республикалары Әзербайжан, Түркменстан, Қырғызстан, Өзбекстан және Россиядағы Татарстан мен башқұрт тілдеріне де аударылыпты. Өте жақсы сапалы аударылған. Біз әулет атынан осы Түрксой қызметкерлеріне, аударған аудармашыларға өз ризашылығымызды білдіреміз.
Авни Чакыр Кастамону, провинциясының губернаторы:
Қазақстанның дүниеге танымал ақыны Мұқағали Мақатаевтың 90 жылдық мерейтойын және кітабының түркі тілдеріндегі жинағының тұсаукесерін өткіздік. Осындай игі шараның Кастамонуда өткеніне ризашылығымыз зор. Бауырлас елдердің рухани шараларын өткізу біз үшін үлкен мәртебе.
Салтанатты шара соңында қазақ пен түріктің ән-күйі шырқалып, бишілер мың бұрала билеп қонақтарға тамаша көңіл күй сыйлады. Бұдан бөлек осы жиыннан соң түркі елдерінің мәдени астаналары туралы фото көрме де ашылды.
Айдос Әшімұлы
