Қазақстанда жылдық инфляция 7,1% жетті

Бір ай бұрын қымбатшылық тура 7% құраған болатын. 

Қазан айының қорытындысы бойынша экономистер Қазақстандағы инфляцияны, яғни, қымбатшылықты 7,1% тең деп бағалады. Бұл туралы бүгін Үкімет отырысында Ұлттық экономика министрі Руслан Дәленов мәлім етті.

Үкіметтің бүгінгі отырысында Қазақстанның он айдағы әлеуметтік-экономикалық дамуы қандай болды деген сұрақ қаралып жатыр. Дәленов Қазақстан экономикасындағы мына өзгерістерді атап өтті.

«Өндіруші емес секторларға салынған инвестиция ұлғайды,нақты секторда өсу сақталды,қызметтер саласы тұрақтанды және экономиканы кредиттеу ұлғайды», - дейді Дәленов.

Қыркүйекпен салыстырғанда, қазанда қызметтер саласы өсім көрсеткен, алайда пандемия кезіндегі шектеу кейбір салаларға әлі де теріс әсер етіп жатыр.

«10 айдың қорытындысы бойынша тауарлар өндірісі 1,9%-ға өсті. Бұл ретте,қызметтер көлемі 6,1%-ға қысқарды. Салдарынан, жедел деректерге сенсек, жалпы ішкі өнім 2,9%-ға төмендеді. Жылдық инфляция 7,1%-ды құрады», - деп хабарлады Дәленов.