АҚШ-та қалың тұманнан 69 көлік соқтығысып, 51 адам жараланды

АҚШ-тың Вирджиния штатында ірі жол-көлік оқиғасы болды. Ричмонд қаласының маңындағы көпірлі тас жолда 69 машина соқтығысып, 51 адам жараланды. «Олардың екеуі ауыр халде, тағы 11-нің жарақаты күрделі, дегенмен өмірлеріне қауіп төніп тұрған жоқ», - дейді дәрігерлер.

Апатқа қолайсыз ауа райы мен тайғақ жол себепші. Қалың тұманнан көпірде жүргізушілер жолдағы қозғалысты байқамай, көліктер бір-бірін қаққан. Көп ұзамай жолдың екінші жағында да дәл осындай апат болған. Осының салдарынан көпірдің екі бағыты бірнеше сағатқа жабылды.

Мамандардың айтуынша, қыспақта қалған көліктерден зардап шеккендерді шығарып алу қиындық тудырған. Қазір оқиға бойынша тергеу жүргізіліп жатыр.

Жансая ҚАПАСҚЫЗЫ