Сайлаудың алдын ала қорытындысы 10-11 маусымда шығарылады - «Qazaqstan» Ұлттық телеарнасы

Сайлаудың алдын ала қорытындысы 10-11 маусымда шығарылады

09.06.2019

Ел тарихында алғаш рет жеті адам мемлекет басшысы лауазымы үшін саяси бәсекеге түсіп жатыр. Бұған дейінгі рекорд 2005 жылы болған еді, ол кезде Орталық сайлау комиссиясы бес кандидатты тіркеді. Сондай-ақ, биылғы сайлау үміткерлер арасында тікелей эфирде дебаттың өтуімен де ерекшеленді.

Қазақстан президенттігіне үміткерлердің саны - 7. Олар 4 партия, 3 қоғамдық ұйым атынан саяси бәсекеге қатысып отыр. Үміткерлердің кандидатурасы сәуірдің 9-ы мен 28-і аралығында ұсынылған еді. Кейін олар мамырдың 11-інен маусымның 8-не дейін сайлауалды үгіт-насихат жұмыстарын жүргізді.

Ал бүгінгі науқан таңғы сағат 7:00-ден кешкі 20:00-ге дейін өтеді. Елде 18 жасқа толған 12 миллионға жуық азаматтың дауыс беруге құқығы бар. Ол үшін республика бойынша 9970 сайлау учаскесі ашылды.

Сондай-ақ, шетелдегі отандастарымыз да таңдау жасауы үшін әлемнің 51 мемлекетінде 65 учаске жұмыс істеп тұр. Сайлаудың ашық әрі әділ өтуін қарауға әлемнің түкпір-түпкірінен мыңнан аса халықаралық байқаушы келді.

Саяси науқанды өткізуге Орталық сайлау комиссиясына бюджеттен 9,4 миллиард теңге бөлінген. Ал сайлаудың алдын ала қорытындысы 10-11 маусымда жарияланбақ. Жеңіске жеткен үміткерді президент ретінде тіркеу маусымның 16-на дейін жүзеге асырылуы тиіс.

Фариза МҰСАҚЫЗЫ

Хабарламаларға жазылу