Алматыда «Білім және бизнес» халықаралық форумы өтті

Бұл туралы Білім және ғылым министрлігінің баспасөз қызметі хабарлайды.

Іс-шараға Қазақстанның ғалымдары мен академиктері, Ұлттық ғылыми кеңестің мүшелері, шетелдік сарапшылар мен жоғары оқу орындарының қызметкерлері қатысты.

Ерлан Сағадиев қатысушыларды тарихымыздағы айтулы кезең - Қазақстан Республикасы Тәуелсіздігінің 25-жылдығы мен осы мереке тұсында аталып өтіп жатқан кәсіби мереке – Ғылым қызметкерлері күнімен құттықтады.

«Қазіргі кезде әлемде ғылым мен жаңа техногияларды дамыту өзекті тақырыптардың бірі. Ғылыми әлеует, ғылыми техникалық ресурстар көбінесе әрбір елдің әлемдік қауымдастықтағы алатын орнын анықтайды. Оның әлеуметтік-саяси экономикалық мәселелерін тиімді шешуге мүмкіндік береді»,-деді министр.

Форумда еліміздің ғалымдары Қазақстанның ғылым саласының дамуы мен өндірісті ғылыми сүйемелдеу туралы баяндама жасады.  Сонымен қатар, шетел сарапшысы Корея ғылыми-техникалық ақпарат институтының өкілі Чал Су Лимнің Қазақстандағы ғылыми-техникалық ақпарат жүйесін Оңтүстік Кореяның тәжірибесін пайдалана отырып жетілдіру мүмкіндіктері бойынша жасаған баяндамасы тыңдармандардың көңілінен шықты.

Сондай-ақ, жиын барысында Қазақстан Республикасы Тәуелсіздігінің 25 жылдық мерейтойына байланысты кітап көрмесі өтті.