«Өз үйім» бағдарламасы басталады

Қазақстанның «Тұрғын үй құрылыс жинақ банкі» салымшыларға қолайлы болуы үшін жаңадан «Өз үйім» атты бағдарламаны іске қосады. Бағдарлама 2022 жылға дейінгі кезеңді қамтымақ. Бұл туралы «Тұрғынүйқұрылысжинақ банкінің» баспасөз қызметі хабарлады.

Қазіргі кезде банк жергілікті атқарушы органдармен, екінші деңгейлі банктермен және құрылыс салушылармен келіссөздер жүргізіп жатыр. «Бағдарламаға «Тұрғынүйқұрылысжинақ банкінің» кез келген салымшысы қатыса алады. Алайда, бірінші кезекте баспанасы жоқ азаматтарға басымдық берілмек. Баспана алу үшін бұрыңғыдай Алматы мен Астана қалаларында кемі екі жыл тұрақты тіркеуде тұру талабы жоқ мұнда. Ал, 2020 жылға дейінгі аймақтарды дамыту бағдарламасында осындай талап қарастырылған»,-делінген банктің баспасөз қызметі таратқан ақпаратта.

Қазіргі кезде бағдарлама аясында тұрғындарға берілетін баспананың әрбір шаршы метрінің құны 180 мың теңге көлемінде бекітіліп отыр. Ал, несиенің жылдық ставкасы 5 тен 10 пайыз аралығында болмақ. 2016 жылы «Өз үйім» бағдарламасы бойынша 350 мың шаршы метр тұрғын үй салынады. Бағдарлама аяқталғанға дейін бұл мөлшер 1,5 млн шаршы метрге жететін көрінеді. Бағдарламаны банктің өзі қаржыландыратыны айтылған.