Жаңалықтарды Telegram арнамыздан оқыңыз!Токиода өткен Математикадан Халықаралық Олимпиадада озып шыққан жеңімпаздар елге оралды. Ел намысын қорғаған үздіктерді Алматының әуежайынан жақындары ыстық ықыласпен күтіп алды.
Сұлтан Мұрат білім сайысында алтын медаль иеленді. 9-сынып оқушысы есеп-қисапқа әуес. Финалда Жапония, Қытай, Гонконг елдерінен келген кіл мықтылармен бәсекеге түсіпті. Сөйтіп, финалда 100 ұпаймен қатарластарынан озып шыққан.
Сұлтан Мұрат, Математикадан Халықаралық Олимпиада жүлдегері:
Расында мен өзімді орын алмаймын деп ойлағанмын. Бірақ осы алтын медальді алып, эмоцияларым шынымды айтсам, көзімнен жас аққан. Осындай олимпиадалар жеке портфолияға үлкен нәтиже береді. Оны келешектегі ЖОО-ға кіру үшін осындай портфолияларды жинау керек.
Білім бәйгесіне еліміздің әр өңірінен 62 адам қатысқан. Бір жыл дайындықтың нәтижесінде 54 оқушы жүлдемен оралды. Оның ішінде 7 алтын, 20 күміс, 27 қола қоржында.
Ділбар Нұрова, математика пәнінің мұғалімі:
Бұл өте қиын сайыс. Мектеп бағдарламасын өте жақсы білуі керек. Сондай-ақ қосымша дайындық жұмыстары да маңызды. Мұнда балаларға 2 сағатта 30 тапсырманы шешуі қажет. Сұрақтар 3 топқа бөлінген. Әр топта сұрақтар қиындықтарына қарай бөлінеді. Сондықтан ұпайлары да әр түрлі.
Биыл сайысқа әлемнің 22 елінен 1500-ден аса оқушы қатысыпты. Ал Математикадан Халықаралық Олимпиада келер жылы Вьетнамда өтеді деп жоспарланып отыр.
Айдана Қуантхан
