Жаңалықтарды Telegram арнамыздан оқыңыз!Қостанайдағы колледждің тәжірибесін солтүстік аймақтарда кеңінен қолдану қажет. Мемлекет басшысы Ұлтттық Құрылтайда осылай деді. Тобыл өңіріндегі автомобиль колледжі соңғы 4 жылда жергілікті кәсіпорындарға қажет мамандарды даярлап келеді. Осылайша аграрлы аймақтан өндірісті өлкеге айналған өңір кадр тапшылығы мәселесін шешті.
Қостанай автомобиль көлігі колледжі жергілікті өндіріс орындарына кадр даярлайды. Мұнда қазір 1400-ден астам студент білім алып жатыр. Өзге өңірлерден келгендер көп. Былтыр Жаңаөзен қаласынан 25 талапкер техник-механик мамандығына оқуға түскен.
Жанболат Темірхан, Қостанай автомобиль көлігі колледжінің студенті:
Маңғыстау облысынан Қостанай автомобиль көлік колледжіне арнайы оқу бойынша грант ұтып келдім. Оқып жатқан мамандығым өзіме қатты ұнайды, биыл екінші курстамын. Өзге де мамандықты алып шығуға болады. Мысалы мен тек техник-механик емес, электрик, дәнекерлеушіні бірге алып шыға аламын.
Оқу бағдарламасының 60 пайызы тәжірибе жүзінде машықтануға арналған. Мысалы мына көлік құрылғысының моделінің батырмасын басып қалсаң, бір жері істен шығады. Ал студенттер лезде қателікті тауып, жөндеуі тиіс. Соңғы төрт жылда колледжде машина жасау саласы бойынша 7 мамандық ашылды. Ал жаңа оқу жылында тағы бір сала бойынша «Қалыпқа құюшы» мамандығына қабылдау басталады.
Дмитрий Павленко, Қостанай автомобиль көлігі колледжінің директоры:
Нарық сұранысын алдын ала болжап отырамыз. Өңірде жаңа өндіріс орнының жобасы қарастырылып жатқанда, біз оған мамандар дайындауға кірісеміз. Құрылтайдан кейін әр өңірден әріптестер байланыса бастады. Өткен аптада Жаңаөзен колледжімен меморандумға қол қойдық. Оларды біздің өндіріс орындарымен, әлеуметтік серіктестік құру тәжірибеміз қызықтырады.
Өңірде бірнеше ірі өндіріс орындарының ашылуынан жұмысшы мамандарға сұраныс артқан. Сондықтан колледж алдағы оқу жылына оңтүстік өңірлерден жастарды көбірек тартуды мақсат етіп отыр.
Мәдина Нағашыбай
