Жаңалықтарды Telegram арнамыздан оқыңыз!Мәжілістің жалпы отырысында депутат Алдан Смайыл Қазақстан Республикасының Премьер-Министрі Кәрім Мәсімовке депутаттық сауал жолдады, деп хабарлайды ҚР Парламенті Мәжілісі аппаратының баспасөз қызметі.
Ол биыл 19-20 мамырда Астанада алғаш рет «Түркі жазуы күні» халықаралық деңгейде аталып өтіп, форумға Түркі кеңесі мен ТҮРКСОЙ-дың басшылары, Түркия, Ресей, Татарстан, Өзбекстан, Қырғыз Республикасы т.б. елдердің ғалымдары, Қазақстанның ЮНЕСКО-дағы өкілдігі қатысқаны туралы атап өтті.
«Ендігі міндет - осы күнді жыл сайын бүкіл түркі дүниесінің рухани-мәдени жаңғыру күні ретінде өткізіп, жаңа бастамаларға ғұмыр беру», - деді депутат.
Сондай-ақ, ол Орхан ескерткіштеріндегі Күлтегін, Тоныкөк, Білге жазбалары баян еткен тарихты әсем сөйлететін әдеби шығармалар мен көркем фильмдерге Түркі академиясы мен ТҮРКСОЙ-дың атынан бәйге жариялауға шақырды.
Әдеби шығармаларды іріктеп, төл тілімізге аударуды және «Түркітектес елдер жазушыларының кітапханасы» сериясын әзірлеуді, сонымен қатар, түркі дүниесін түгел қамтыған ортақ энциклопедия шығаруды ұсынды.
