Медициналық туризмді дамыту маңызды

Өзбекстанның Қазақстандағы жылы аясында көрші мемлекеттің туроператорлары мен блогерлері үшін ақпараттық тур ұйымдастырылды. Меймандар Астананың жетекші емханаларында болып, науқастарды емдеу шараларымен танысты. Іс-шара отандық медициналық туризмнің әлеуетін көтеру мақсатында өткізіліп отыр. Кездесуде медициналық туризмді одан әрі дамыту мәселелері қозғалып, меморандумға қол қойылды. Былтырдың өзінде Республикалық диагностикалық орталықта шетелдік 1600 науқас емделді. Оның 600-і Өзбекстан азаматы.

Айта кетейік, Денсаулық сақтау министрлігі медициналық туризмді дамыту үшін алдағы жылы 1 миллиард теңге бөліп, кем дегенде 32 мыңнан астам медициналық туристі тартуды көздеп отыр.

Фариза МҰСАҚЫЗЫ