Эйфель мұнарасына 130 жыл толды

Франциядағы әйгілі Эйфель мұнарасына биыл 130 жыл. Саяхатшылардың көзайымына айналған ескерткіш мерейтойын атап өту үшін түрлі шаралар ұйымдастырылған. Соның бірі - Париждегі балалар үйінің 1300 тәрбиеленушісіне арналған экскурсия. XIX ғасырдың киімін киген әртістер балаларды оның тарихымен таныстырып, қызықты деректерді айтты.

Сонымен қатар, тұрғындар үшін түнде мұнарада жарықтың көмегімен ерекше отшашу көрсетілді. Айта кетсек, ескерткіш жобасын 1889 жылы Дүниежүзілік көрме үшін Густав Эйфель есімді инженер жасаған. 324 метрлік темір конструкция құрылысына 2 жыл уақыт кетіпті. Ал, оны тамашалау үшін Парижге жыл сайын 7 миллиондай турист барады екен.

Жансая ҚАПАСҚЫЗЫ