Сирияда Ресейдің 4 жауынгері қаза тапты

Сирияда Ресейдің 4 әскери қызметкері қаза тапты. Олар елдің шығысындағы Дейр-әз-Зор провинциясында содырлармен қақтығыста мерт болған. Құрбандардың ішінде екі кеңесші бар. Ресейліктер Сирияның армиялық батареясына шабуыл жасалғанда оққа ұшқан. Тағы екеуі ауыр жарақаттан жантәсілім етті. Бесеуі жараланған.

Үкімет әскері Дейр-әз-Зор провинциясын былтыр азат етті. Бірақ, мұнда «ДАИШ» әлі де белсенді.

Сириядағы адам құқығын бақылау ұйымының мәліметінше, бұл шабуылды  дәл осы «ДАИШ» ұйымдастырып, 35 адамды өлтірді. Солардың 26-сы жергілікті әскер сарбаздары, 9-ы – ресейліктер. Ресми Мәскеу болса, 43 содырды жойғанын хабарлап отыр.

Арыстан РЫСБЕК