Volkswagen өз тұтынушыларына 5 мың доллардан өтемақы төлеуі мүмкін

Неміс концерні өздері шығарған көліктерге қатысты дауды реттеген сыңайлы. АҚШ билігімен келісімге келген компания даулы көлік маркасын алған әр тұтынушыға 5 мың доллар төлейтін болды.

Volkswagen-нің АҚШ нарығына шығарған дизель қозғалтқышы бар көліктерінің қоршаған ортаға зиян тигізетіні анықталған еді. Бұл көліктерге орнатылған құрылғының қозғалтқыштан шыққан газдың мөлшерін азайтып көрcететіні белгілі болған. Нәтижесінде компания үлкен дау-дамайға ұрынған болатын.

Reuters агенттігінің хабарлауына қарағанда АҚШ нарығына неміс концерні осы дауға себеп болған қозғалтқышы бар 600 мың машина сатқан көрінеді. Бұл көліктерге иелік еткен әрбір тұтынушыға концерн 5 мың доллардан өтемақы береді. Осылайша, концернің қулығы ұзаққа бармай отыр. Өтемақының жалпы құны 3 млрд долларды құрап отыр. Дегенмен, Volkswagen осы өтемақыдан кейін өзге айыппұл төлемеуі де мүмкін.