Жыл соңына дейін «Даму» қорының барлық бағдарламалары цифрлы форматқа көшіріледі

Жыл соңына дейін «Даму» кәсіпкерлікті дамыту қорының барлық бағдарламалары цифрлы форматқа көшіріледі. Бұл туралы Алматыда өткен «IT-DAY» атты конференцияда айтылды. Негізі қордың жұмысын автоматтандыру жүйесі былтыр басталып кеткен. Ал, бүгінгі жиында сол жобаны кезең-кезеңімен жетілдіріп, кәсіпкерлерге ыңғайлы жағдай жасау мәселелері талқыланды.

«Бизнеске деген ынтаны арттыру үшін цифрландырудың рөлі зор»,-дейді кәсіпкерлер. Өйткені, автоматтандыру жүйесін өткен жылдың қыркүйек айында енгізген «Даму» қорының мамандары мемлекеттік қолдауға ие болған жобалардың саны соңғы 4 айда 4 есеге артқанын айтады. Мәселен, 2017 жылы 2581 кәсіпкер қордың қолдауына ие болса, соның 45 пайызы қызметті  «Digital DAMU» атты жаңа цифрлы формат негізінде алған.

«DigitalDAMU»-дың  артықшылығы – кәсіп ашқысы келген кез келген азаматқа қанша қаржы керек, қандай бағдарлама бар, мемлекеттік субсидия мен банк несиелерінің пайыздық мөлшерлемесі қанша? Осы сұрақтардың бәріне әп-сәтте жауап беріледі. Ал, мамандар биыл толықтай цифрлы платформаға өтуді жоспарлап отыр. Онда бұл қызметтердің бәрін кеңсеге келмей-ақ, үйде отырып алуға болады. Тіпті, клиенттердің құжаттары банктерге автоматты түрде жіберіледі.

Дамудың жаңа кезеңіне аяқ басқан «Даму» қоры ішкі және сыртқы процестердің барлығына электронды құжат айналым жүйесін енгізбек. Яғни, қолма-қол қағаз құжаттардың бәрі тоқтатылып, қызмет түрлері тек онлайн форматта жүргізіледі.

Амангелді СЕЙІТХАН