Басты Жаңалықтар Кәсіпкерлерге қолдау көрсетілуде

Кәсіпкерлерге қолдау көрсетілуде

23.06.2014 08:30

«Бизнестің жол картасы - 2020» бағдарламасы көптеген кәсіпкердің қызмет аясын кеңейтуіне сеп болды. Солардың бірі – теріскейлік Жаңабай Пірманов. Былтыр түйе фермасына электр желісі тартылып, қоражайының жағдайын жақсартуға мүмкіндік алды.

Пірмановтар отбасы Қазақстанға 1996 жылы Өзбекстаннан қоныс аударған болатын. Атажұртқа келіп, бәзбіреулер сияқты шіреніп жатып алған жоқ. Шаруа құрып, өсіп-өнудің қамына кірісті. Түйе сатып алып, ферма салды. Былтыр мемлекеттің қолдауымен қоражайына электр желісі тартылды.

Жаңабай Пірманов, «Тамды» шаруа қожалығының басшысы:

Үкімет тарапынан 5 миллион 800 мың теңге бөлініп, 1,5 шақырымға желі тартып берді. Бүгінгі таңда шаруашылығымызда жарық бар. Келешекте шаруашылықты өркендетуге толық жағдай бар.

Жаңабай Пірманов - отбасылық бизнесті ұйымдастырушы. Қазір екі інісі мен ұлы да осы шаруашылықта еңбек етеді. Ұйымшылдықтарының арқасында бүгінде түйе саны 50-ге жетті. Оған қоса 100 шақты қара мал өсіреді. Ал, ең басты қамқоршысы ұлы – Жомарт.

Жомарт Пірманов, ұлы:

Менің міндетім - осы техникамен байланысты. Егін себу бәрі менің мойнымда.

Пірмановтардың ендігі мақсаты – шұбат өндірісін қолға алу. Оған барлық мүмкіндік бар. Болашақта мал санын көбейтіп, сауын фермасын жолға қоймақ.

Сағындық СӘБИТҰЛЫ

Бөлісу