200 азамат жәрдемақы алудан өз еркімен бас тартты

Биыл 200-ден астам азамат жәрдемақы алудан өз еркімен бас тартты. Олар мемлекеттік органдарға барып, әлеуметтік жағдайының түзелгенін, енді төлем қажет емес екенін айтқан. Алдағы уақытта мұны үйден шықпай-ақ онлайн жүзеге асыруға болады. Жуырда еGov Mobile қосымшасында әлеуметтік көмекке мұқтаж емес азаматтарға арналған сервис іске қосылады. Бұл туралы Олжас Бектеновтің төрағалығымен өткен кеңесте айтылды. Былтыр 480 мыңнан астам отбасының тұрмыстық жағдайы жақсарған. Жыл басынан бері тағы 465 мыңға жуығы «әл-ауқаты жоғары отбасы» санатына ауыстырылған.

Ерасыл Жұманбаев, «Еңбек орталығын дамыту орталығы» АҚ басшысы:

Бізде қазіргі таңда, жалпы, жергілікті атқарушы органдардың барлық қызметтері бірыңғай цифрлық жүйеге енгізілді. Жалпы, азаматтар өтініш берген жағдайда алдыңғы таңда азаматтың үйін зерделеген болса, қазір қосымша жасанды интеллект талқылайды, нәтиже шығаратын жүйе болып саналады.

Келесі жылы әлеуметтік салаға 10 триллион теңгеден астам бөлінеді. Ендігі мәселе - көмектің көлемінде ғана емес, оның нақты кімге және қаншалықты тиімді жетіп жатқанында. «Министрлік әлеуметтік көмек пен жеңілдіктердің дұрыс үлестірілгенін қадағалауы тиіс», - деді Премьер-министр. Жауапты ведомство отбасының жағдайын анықтау үшін мемлекеттік ақпараттық жүйелердегі мәліметтер пайдаланылатынын атап өтті. Отбасы мүшелерінің қайда жұмыс істейтіні, қанша табыс табатыны, қандай мүлкі бар екені қаралады.