Шымкентте таудан аққан сел бірнеше көшені шайып кетті

Шымкентте тұтас бір елдімекен су астында қала жаздады. Түн ішінде таудан аққан сел Елтай шағын ауданындағы тұрғындарды әбден әбігерге салды. Толассыз жауыннан кейін бірнеше көше мен жеті үйдің ауласын су басқан. Қазір тасқын салдарын жою үшін мамандар жұмыс істеп жатыр.  

Марлан Жолдахмет, Еңбекші ауданы әкімінің орынбасары:

Нөсер су осы каналдың бойымен аман-есен өтіп шықты. Басып қалған үйлер болған жоқ. Мына Найзатас көшесінің бойында екінші қырдан аққан ағынды судың салдарынан 7 үйдің ауласына су басты. Қазіргі уақытта көшені тазалау жұмыстарын жүргізу барысындамыз. Осы 7 үйдің ауласын тазалау барысында.

Жауаптылардың мәліметінше, аумақты лай мен тастан тазарту үшін 6 арнайы техника мен 50 адам жұмылдырылған. Алдағы уақытта селден келетін қауіпті азайту үшін канал жағалауын бетондап, нығайтпақ.