Басты Жаңалықтар Астанадағы Триатлон саябағында рейд жүргізілді

Астанадағы Триатлон саябағында рейд жүргізілді

16.07.2026 17:30

Елордалық полицейлер демалыс маусымында қоғамдық орындарда тәртіп пен тазалықты сақтауға ерекше мән беруге шақырады. Осы мақсатта Астанада саябақтар мен халық көп шоғырланатын демалыс орындарында профилактикалық рейдтер тұрақты түрде ұйымдастырылып келеді. Бұл жолы тәртіп сақшылары мен аудан әкімдігі өкілдері Триатлон саябағында тұрғындарға түсіндіру жұмыстарын жүргізді.

Таңертеңнен кешке дейін аумақты аралап, қоғамдық тәртіпті бақылау – тәртіп сақшыларының күнделікті қызметінің бір бөлігі. Рейд барысында полицейлер демалушыларға қоғамдық орындарды таза ұстаудың маңызын түсіндіріп, қоқысты арнайы жәшіктерге тастауды ескертті. Заң талаптарын бұзғандарға алдымен ескерту жасалды. Ал қайталанған жағдайда әкімшілік жауапкершілік қарастырылған.

Нұралы Тәңірбергенов, Астана қаласы Алматы ауданы полиция басқармасының аға инспекторы:

Жалпы қоғамдық орындарды ластау, скверлер мен саябақтарда коммуналдық қалдықтарды қалдырып кету фактілері бар. Мынау саябақтар мен скверлерде көп емес, бірақ өкінішке қарай, ондай деректер бар. Оған тиісті шараларды көреміз. Ескерту жұмыстары бар, заңды шара қолданатынымыз бар. Әркімнің жасаған құқық бұзушылығына сай айыппұлдар бар.

Тұрғындардың айтуынша, тазалыққа деген жауапкершілік ең алдымен отбасында қалыптасады. Ал мұндай профилактикалық шаралар жастардың қоршаған ортаға жанашырлықпен қарап, қоғамдық тәртіпті сақтауға деген жауапкершілігін арттыруға ықпал етеді.

Бақыт Мерғазыұлы, қала тұрғыны:

Ортаның тазалығына ерекше мән беру керек. Осындай тәрбие, үгіт жүргізсе, біздің болашақ жастарымыз бұдан да тәртіпті, бұдан да мәдениетті Таза Қазақстан құру үшін атсалысады. Өзіміз таза жүрміз, таза киініп жүрміз. Мынадай ортада, еліміздің Астанасында тазалық болмаса өте ұят. Сондықтан тазалықты ұрпағымыз үшін ерекше дәріптейміз.

Мұндай профилактикалық рейдтер елорданың барлық ауданындағы саябақтар мен көпшілік демалатын орындарда тұрақты түрде өткізіліп келеді. Негізгі мақсат – тұрғындарды жауапкершілікке тарту емес, қоршаған ортаға ұқыпты қарау мәдениетін қалыптастырып, қоғамдық орындардың тазалығын сақтау. Өйткені, тазалық – әр тұрғынның ортақ жауапкершілігі.

Автор

Айнұр Маратқызы

Бөлісу