Экологиялық талапты бұзған 3 кәсіпорынның жұмысы тоқтатылды

Шымкентте экологиялық талаптарды өрескел бұзған үш кәсіпорынның қызметі сот шешімімен уақытша тоқтатылды. Мамандардың айтуынша, соңғы үш жылда шаһардағы атмосфераға таралған зиянды қалдықтар көлемі 31 мыңнан 40 мың тоннаға дейін көбейген. Осыған байланысты жыл басынан бері өндіріс орындарына 26 тексеру жүргізіліп, 39 әкімшілік құқық бұзушылық анықталды. Заң талаптарын бұзған кәсіпорындарға жалпы көлемі 90 миллион теңгеге жуық айыппұл салынса, оның 70 миллион теңгесі бюджетке өндірілген. Зертханалық сараптама қорытындысы бойынша бірқатар өндіріс ошақтарының басшыларына анықталған кемшіліктерді жою жөнінде нұсқама берілді. Талаптар орындалмаған жағдайда іс материалдары сотқа жолданады. Ал ауаның ластануын азайту үшін экологтар полициямен бірлесіп, автокөліктерден шығатын зиянды заттарға рейдтік бақылауды күшейтті.