Шымкентте көлік тұрағының орнына пальма өсіріп қойды

Шымкентте бұрынғы көлік тұрағының орны банан мен пальма ағаштары жайқалған аллеяға айналды. Жергілікті кәсіпкер аумақты өз қаражатына көгалдандырып, ерекше ландшафттық жобаны жүзеге асырған. Оның айтуынша, мегаполистің жылы климаты экзотикалық өсімдіктердің тез жерсініп, өсіп-өнуіне қолайлы. Мұнда тропикалық ағаштармен қатар магнолия, ақ қайың, шырша, арша, гортензия және сәндік гүлдер отырғызылған. Бірнеше ай бұрын егілген көшеттер бүгінде тамыр жайып, көрік беріп тұр. Тәжірибе оң нәтиже берсе, кәсіпкер мұндай жасыл кеңістіктерді көбейтуді жоспарлап отыр.

Біз бұл жобаны «Таза Қазақстан» акциясы аясында, тәжірибе ретінде бастадық. Шымкенттің климаты экзотикалық өсімдіктерге қаншалықты қолайлы екенін көргіміз келді. Банан ағаштарын қыста міндетті түрде орап, жылы ұстаймыз. Жасыл желектің барлығы толық жерсініп үлгерді. Енді жақсы күтім қажет. Жақын маңдағы тұрғындар келіп, серуендеп, суретке түсіп жатады. Алғыстарын айтып жатыр.