Биыл жатақхана мәселесі толық шешілмек

Студенттер жатақханасындағы орын тапшылығы жыл соңына дейін шешіледі. Қазір бұл мәселе тек Алматы қаласында ғана бар. Ғылым және жоғары білім министрінің айтуынша, мегаполисте 5 мыңнан астам төсек-орын жетіспейді. Саясат Нұрбек проблема кезең-кезеңімен шешіліп жатқанын және биыл қалада 20-ға жуық жатақхана пайдалануға берілетінін жеткізді. Қаржыландыру мемлекеттік және жергілікті бюджеттен, сондай-ақ инвесторларды тарту арқылы жүргізілгенін атап өтті.

Саясат Нұрбек, ҚР Ғылым және жоғары білім министрі:

Субсидиялау тетігі өзінің нәтижесін беріп жатыр. Соңғы бес жылда осы механизмді пайдаланған жеке инвесторлардың көмегімен шамамен 60 мың орын мәселесін шештік. Биыл жатақханаға қатысты талаптар қайта қаралды. Қазір министрлік жоғары оқу орындарынан студенттердің кемінде 80 пайызын орынмен қамтамасыз етуге міндетті. Қазір келесі оқу жылына дайындықты бастап кеттік.