Басты Жаңалықтар «Кітап оқитын ұлт» жобасының үздіктері анықталды

«Кітап оқитын ұлт» жобасының үздіктері анықталды

22.05.2026 20:56

Шымкентте «Кітап оқитын ұлт» жобасының үздіктері марапатталды. Пилоттық жобаға 66 мың адам қатысып, 500 мыңнан астам кітап оқылды. Алты бағыт бойынша өрбіген білім сайысында мектеп оқушыларынан бастап мемлекеттік қызметшілерге дейін бақ сынады.

15 мыңнан астам отбасы бақ сынаған «Кітап оқитын әулет» номинациясында Сыздықовтар әулеті топ жарды. Бір шаңырақ астында бірнеше буын кітап оқуды дәстүрге айналдырған. Олардың айтуынша, бұл әдет отбасындағы рухани байланысты нығайтып, ортақ құндылықтарды қалыптастырған.

Гүлмира Мырзалиева, жоба жеңімпазы:

Бұл менің хоббиім былайша айтқанда да. Өзім кітап оқығанға өте құмар болғандықтан отбасымды да осыған тартым. Еңбегіміз еш болмады. Оқыдық, талдадық, бірақ керемет дүниені алдық, рухани байыдық.

Былтыр күзде басталған пилоттық жобаға 66 мыңнан астам адам қатысып, әрқайсы орта есеппен 15 кітап оқыды. Жалпы оқылған кітап саны 500 мыңнан асты. Мектеп оқушылары мен студенттер, педагогтар мен мемлекеттік қызметкерлер рухани жаңаруға ден қойды.

Ғабит Сыздықбеков, қала әкімі:

Біз Шымкентті тек дамыған мегаполис емес, руханияты биік, кітап оқу мәдениеті қалыптасқан интеллектуалды қала ретінде дамытуымыз қажет. Осы бастаманы қолдаған барша азаматтарға алғыс білдіремін.

Игілікті бастама қала тұрғындарының кітап оқуға деген қызығушылығын арттырып, қоғамдық сана мен рухани мәдениетті дамытуға жол ашты. Ауқымды жоба алдағы уақытта да жалғасын табады.

Автор

Ернұр Уәлихан

Бөлісу