Алматыда қоғамдық орында отшашу атқандар анықталды

Алматыдағы саябақта отшашу атып, қауіпті жағдай туғызған құқық бұзушылар анықталды. Оқыс жағдай Махатма Ганди атындағы саябақта болған. Куәгерлердің айтуынша, кеше кешкі сағат 21:30 шамасында масаң күйде болған ер адамдар саябақтың дәл ортасында отшашу атпақ болған. Алайда бір сәтте пиротехника салынған қорап аударылып кетіп, отшашу аспанға емес, жан-жаққа атылған. Сол сәтте саябақта балалар мен қарт кісілер серуендеп жүрген. Қалалық полиция департаменті қоғамдық орында отшашу атқандарға қатысты тексеріс бастап, төрт ер адамға хаттама толтырды. Қазіргі уақытта оқиғаның мән-жайы жан-жақты зерттеліп жатыр. Тексеру қорытындысы бойынша олардың әрекетіне құқықтық баға беріліп, заң аясында тиісті шаралар қабылданады, - деді Алматы қалалық полиция департаменті.

Салтанат Әзірбек, Алматы қалалық ПД ресми өкілі:
4 азамат, олардың барлығы полицияға жеткізілді. Төртеуіне қатысты Әкімшілік кодекстің 436-бабы бойынша әкімшілік хаттамалар толтырылып, олар 30 АЕК мөлшерінде айып төлейді. Азаматтардың тыныштығын бұзуға ешбір жол берілмейді, әсіресе, қоғамдық орындарда.