Алматыда коммуналдық қызмет күшейтілген жұмыс тәртібіне көшті

Алматыда таңнан бері нөсер жауын жауып тұр. Қолайсыз ауа райына байланысты коммуналдық қызметтер күшейтілген жұмыс тәртібіне көшті. Коммуналдық инфрақұрылым және тұрғын үй инспекциясы басқармасының дерегінше, тәулік бойы кезекшілік  ұйымдастырылған. Бұл бағыттағы жұмыстарға 104 бірлік арнайы техника, 74 мотопомпа және 12 ассенизаторлық көлік тартылған. Оның ішінде 9 техника су басу қаупі жоғары аумақтарға орналастырылған. 75 жедел бригада жасақталып, жалпы алғанда тәулігіне 2700 жұмысшы жұмысқа жұмылдырылмақ. Қосымша көмек ретінде Алматы қаласының құтқару қызметі де кезекшілікке шығады. «Қазгидромет» синоптиктерінің мәліметінше, бүгін-ертең Алматыда жаңбыр жауып, найзағай ойнайды.