«Таңбалы: Бабалар коды» халықаралық көрмесі ашылды

Көне дәуірден үн қатқан, ЮНЕСКО-ның бүкіләлемдік мұралары қатарына енген Таңбалы петроглифтері ұлттық брендке айналуы тиіс. Бүгін Алматыда құнды жәдігерді насихаттауға бағытталған «Таңбалы: Бабалар коды» атты халықаралық көрме ашылды. Онда фототуындылар, петроглифтер негізінде жасалған арт-нысандар және жасанды интеллект қолданылған цифрлық жобалар таныстырылды. Шара «Таңбалы» мемлекеттік тарихи-мәдени және табиғи музей-қорығы мен фотосуретші Владислав Кимнің бірлескен жобасы ретінде жүзеге асты. Іс-шараға Алматыдағы ЮНЕСКО өкілдері, шетелдік сарапшылар мен отандық ғалымдар қатысты.

Бибігүл Дәндіқарақызы, «Таңбалы» мемлекеттік тарихи-мәдени және табиғи музей-қорығының директоры:

Көрме арқылы Таңбалының ерекшелігін, құндылығын, бірегейлігін көрсету. Таңбалыны ұлттық бренд ретінде қалыптастыру бағытында жұмыс істейміз деп ойлаймын.

Владислав Ким, фотосуретші:

Мұндай бірегей жоба елімізде алғаш рет іске асып отыр. Көрменің басты мақсаты – Таңбалы петроглифтерін жанды мәдени мұра ретінде кеңінен насихаттау, оларды заманауи өнер құралдары арқылы қолжетімді ету. Арт-нысандарда ежелгі бейнелер «ата-баба коды» ретінде көрініс тауып, біз мақтан ететін құнды жәдігерлер цифрлық технологиялар арқылы жаңаша қырынан ұсынылады.