Алматыда «Жасыл болашақ» эко саябағы ашылды

«Таза Қазақстан бізден басталады». Осылай деп ұрандатқан алматылық бүлдіршіндер ата-аналарымен бірге жаппай шырша отырғызды. №76 бөбекжай балабақша аумағында ашылған эко саябаққа әр бала өз есімімен белгіленген ағашты екті. Сондай-ақ олар өздері салған суреттері мен тілектерін арнайы «уақыт капсуласына» салып, болашаққа хат қалдырды.

Ләззат Байбосынова, балабақша меңгерушісі:

Біз ата-аналар, педагогтармен бірлесе отырып, жасыл аймақты көбейтуді жалғастырамыз. Біздің балабақшада бұдан да басқа жобалар бар. «Жасыл балабақша» жобасы аясында балалар дәнді өздері егеді, бақылайды, зерттейді. Сондай-ақ жылыжаймыз бар. Қияр, қызанақ егеміз.

Мансұр Жалғасұлы, балабақша тәрбиеленушісі:

«Таза Қазақстан» - біздің болашағымыз. Табиғат ол айнала, қасиетті өлкеміз. Сондықтан әр адам жауапкершілікті арттырып, табиғатқа шынайы жанашырлық танытуы тиіс.