Қазақстан –Пәкістан: Бірлескен жобалар көбейеді

30-дан астам коммерциялық құжат. 200 миллион долларға келісім. Исламабадта өткен Қазақстан – Пәкістан бизнес форумында тараптар қаржы, логистика, өнеркәсіп, энергетика және тағы басқа салалар бойынша әріптестікті кеңейтуге уағдаласты. Енді Қазақстан банктері Оңтүстік Азия нарығына кірмек. Бұл бизнес арасындағы төлемді жеңілдетеді. Сонымен қатар ортақ инвестициялық алаң құрылып, бірлескен жобаларға қаржы құйылады. Толығырақ тілшіміз тарқатады.

Шерхан Жамбылұлы, тілші:

Пәкістан. Ауыл шаруашылығы, жеңіл өнеркәсібі дамыған ел. Фармацевтика саласында әлемде көшбасшылардың бірі. Мұнда әлемдегі барлық футбол доптарының 70 пайызы шығарылады. Бұл өнімдер біздің нарықта сұранысқа ие. Ал ислам республикасына Қазақстанның тауарлары, азық-түлік, астық пен мұнай қажет. Былтыр алыс-беріс 100 млн доллар болды. Ендігі меже – миллиардтан асыру.

Былтыр екі ел арасындағы тауар айналымы екі еседей өсті. Қазақстанда Пәкістан капиталының үлесі бар 200-ден астам компания құрылыс, ауыл шаруашылығы, тағам өнеркәсібі, индустрия және басқа да көптеген салада жұмыс істейді. Осы оң үрдіске арқа сүйей отырып, екіжақты сауда көлемін 1 миллиард долларға дейін ұлғайтуды көздейтін өршіл мақсат қойдық.

Бұл ретте «Қазақстан темір жолы» ұлттық операторы, «Қазпошта» акционерлік қоғамы мен Пәкістанның ұлттық логистика корпорациясы және Pakistan Post компаниясы арасында келісімге қол қойылуын құптаймын. Олардан мультимодальды көлік шешімдерін ілгерілетуге және елдеріміздің порт инфрақұрылымын бірлесе пайдалануға жол ашатын нақты қадамдар күтеміз.

Біздің күш-жігеріміз ұлттық, тіпті жаһандық деңгейдегі ірі IT компаниялардың құрылуына ықпал етті. Мысалы қазақстандық InDrive платформасы Пәкістанда кеңінен пайдаланылады. Былтырғы көрсеткіш бойынша, қосымша Пәкістандағы такси нарығының 60 пайыздан астамын иеленген. Осылайша қала ішіндегі қозғалыста бірінші орынға шыққан. Пәкістандық серіктестерді IT және инвестиция салаларындағы мүмкіндіктерімізді пайдалануға шақырамын.