Президент Қазақстан халқын Бірлік күні мерекесімен құттықтады

Бүгін - Қазақстан халықтарының бірлігі күні. Мемлекет басшысы Қасым-Жомарт Тоқаев отандастарымызды атаулы мерекемен құттықтады. Президент бұл – мемлекетіміз үшін айрықша мәні бар мейрам, жұрт болып жұмыла білсек қана, биік белестерді бағындырамыз,- деді.

Қасым-Жомарт Тоқаев, Қазақстан Республикасының Президенті:

Құрметті отандастар, Қазақстан халқының бірлігі мерекесі құтты болсын! Бұл – мемлекетіміз үшін айрықша мәні бар мейрам. Жұртымыз ортақ құндылықтарға негізделген жасампаз мақсаттарға жету жолында бар күш-жігерін жұмылдырып, болашаққа сеніммен қадам басып келеді. Кең байтақ жерімізде түрлі этнос өкілдері өзара келісімде, тату-тәтті өмір сүріп жатыр. Еліміз теңдікке, өзара сенімге және мәдени әралуандылықтың жасампаз әлеуетіне арқа сүйеп, ел бірлігін одан әрі нығайта түседі. Біз жұрт болып жұмыла білсек, кез-келген сынақты еңсеріп, биік белестерді бағындырамыз. Ұлтымыздың арман-мұраты – Әділетті әрі Қуатты Қазақстанды бірге құру. Баршаңызға бақ-береке тілеймін. Бірлігіміз бекем, аспанымыз ашық болсын!

Нұрсұлтан Тілектес