Президент: Ең үлкен марапат – елдің тыныштығы

Қоғамда татулық болмаса, басқа жұмыстың бәрі бекер. Мемлекет басшысы Қазақстан халқы Ассамблеясының ХХХІV сессиясында осылай деді. Президент ұлттың ұйтқысы болған, халқымыздың береке-бірлігін нығайтуға үлес қосқан ассамблея мүшелерінің еңбегін ерекше атады.

Қасым-Жомарт Тоқаев, Қазақстан Республикасының Президенті:

Жұртымыз үшін ең үлкен марапат – елдің тыныштығы. Шын мәнінде, қоғамда татулық болмаса, басқа жұмыстың бәрі бекер болмақ. Береке-бірлігімізді сақтай алмасақ, қастерлі Тәуелсіздігіміздің баянды болуы да екіталай. Еліміздегі тұрақтылықты нығайту үшін Ассамблея мүшелері табанды еңбек етіп келеді. Мен баршаңызға шын жүректен алғыс айтамын. Алдағы уақытта да ел игілігін арттыруға мол үлес қоса бересіздер деп сенемін.

Ассамблея сессиясында Президент күрделі кезеңде жұдырықтай жұмылып, кез келген сын-қатерді бірге еңсерудің маңызына тоқталды.

Қасым-Жомарт Тоқаев, Қазақстан Республикасының Президенті:

Тағы бір мәселе. Қазіргі күрделі жағдайды жеке мүддесіне пайдаланғысы келетін түрлі популистер мен саясаткерсымақтар бар. Ел мүддесіне қастық ойлаған ондай адамдарға тұтас қоғам болып қарсы тұруымыз керек. Алда күрделі кезең келе жатыр. Оңай болмайды. Бірақ алаңдауға еш негіз жоқ. Біз сын-қатердің бәрін еңсеріп келеміз. Бұл жолы да солай болады. Ең бастысы, барынша жинақы болып, нақты нәтижеге ұмтылуымыз керек.

Нұрсұлтан Тілектес