Екі ел университеті бірлескен оқу бағдарламасын әзірлейді

Қызылорданың Қорқыт ата университеті мен Сеул ұлттық ғылым және технология университеті бірлесіп, ІТ мамандарын даярлап шығармақ. Оңтүстік Кореядағы жоғары оқу орнының басшылары мен профессорлары Қызылордаға келіп, қос диплом бағдарламасы бойынша оқу бағдарламасын талқылады. Келешекте студенттердің екі елде білім алуына жағдай жасалмақ және оқытушылар құрамы да өзара тәжірибе алмасып, бірлескен зерттеу жобаларын әзірлейтін болады.

Дон Хван Ким, Сеул Ұлттық ғылым және технология университетінің президенті:

Осы жылдан бастап ІТ мамандығы бойынша қос диплом бағдарламасымен оқытуды бастаймыз. Талапты білімпаз жастар іріктеліп, екі жыл Қорқыт ата университетінде, екі жыл Кореяда Сеул ұлттық ғылым және технология университетінде білім алатын болады. Бұл бастама қазақ жастарының әлемнің озық технологияларын меңгеруіне жол ашады. 

Рауза Мендалиева, Ғылым және жоғары білім министрлігінің басқарма басшысы:

Президенттің тапсырмасы аясында 3 жыл болды, осы шетелдік университеттерді Қазақстанға алып келіп, олармен стратегиялық әріптестік орнатып жатырмыз. Шетелдік университет біріншіден қос дипломды бағдарламадан бастайды және де нәтижесін көргеннен кейін филиал деңгейіне көтеріледі.

Әділбек Серікұлы