Жаңалықтарды Telegram арнамыздан оқыңыз!II дүниежүзілік соғысына еліміздің әр бесінші азаматы қатысты. Қазақ тарихшыларының дерегінше, 1938 жылдан бастап әскерге алынғандарды есепке алғанда 1 млн 366 мыңнан аса адам соғысқа аттанды. Олардың 600 мыңы майданда қайтыс болса, 271 мың отандасымыздан әлі күнге дейін хабар жоқ. Қазақстандықтардың бұдан да басқа Жеңіске қосқан үлесі туралы бүгін Алматыда өткен Қазақстан-Ресей конференциясында айтылды.
Соғыс туралы естеліктер – біздің ортақ тарихымыз, келешектегі бірлескен ынтымақтастықтың негізі. Конференцияның ашылуында сөз алған Қазақстан Президенті әкімшілігің өкілі Отанды қорғаған азаматтардың ерлігі жастарды тәрбиелеуде маңызды рөл атқаратынын атап өтті.
Абзал Нүкенов, ҚР Президенті әкімшілігі ішкі саясат бөлімінің меңгерушісі:
Бүгінде Қазақстанда II дүниежүзілік соғысына 111 ардагері тұрады. Олармен теңестірілген және басқа санаттағы 41 430 ардагер бар. Мемлекет тарапынан майдангерлерге жыл сайын кешенді әлеуметтік-материалдық көмек көрсетіліп келеді. Биыл Жеңістің 80 жылдығына орай ардагерлерге 5 млн теңгеден беріледі.
Сұрапыл соғыста жанқиярлық ерлік көрсеткен 528 отандасымыз Кеңес Одағының батыры атанды. Өз жанын құрбан етіп, жүз мыңдаған адамның өмірін сақтап қалса да, лайықты марапат алмағандар да аз емес.
Аида Балаева, ҚР Мәдениет және ақпарат министрі:
Иә, бұл ұлы оқиғаның Қазақстан халқы үшін мәні ерекше. Соғыс зардабы тимеген бірде-бір қазақстандық отбасы жоқ деуге болады. Жыл өткен сайын оның мәні мен маңызы арта түсуде. Себебі тікелей қатысқан ардагерлеріміздің, тыл еңбеккерлерінің және сол сұрапыл жылдардың куәгерлерінің қатары сиреп барады.
Соғыс оты тұтанғанда Қазақстан аумағында 12 атқыштар және 4 кавалерия дивизиясы, 7 атқыштар бригадасы, 50-ге жуық жеке полк пен батальон құрылды.
Григорий Гуров, Ресей Федерациясы жастар ісі жөніндегі федералдық агенттігінің басшысы:
Қазақстанда жасақталған панфиловшылар дивизиясының Мәскеуді жанқиярлық ерлікпен қорғап қалғанын білеміз. Олардың барлығы дерлік қаза тапты. Мұны біздің оқушыларымыз жақсы біледі. Бұл деректер – ортақ тарихымыздың бір бөлігі. Оны ешқашан ұмытпаймыз.
Лайла Ахметова, тарих ғылымдарының докторы:
Бұл – сол кездегі барша Кеңес халқының жеңісі. Қаншама боздақтың қанымен келді. Жеңістің 80 жылдығына орай көп шара атқарылып жатыр. Соғыстың зардабын тереңірек түсіне бастағанымыз қуантады.
Алматыдағы конференция Қазақстан мен Ресейдің бірлесіп ұйымдастыратын іс-шараларының бастамасы болды, дейді сарапшылар. Қос ел өкілдері гуманитарлық ынтымақтастық аясындағы шаралар жоспарына қол қойды.
Қуан Нұрақын
