Жаңалықтарды Telegram арнамыздан оқыңыз!Жуырда Астанада кәсіпқой бокс кеші өтеді. Қазақстандық Жәнібек Әлімханұлы француз боксшысы Анауэль Нгамиссенгемен жұдырықтасады. Бүгін елорда тұрғындары мен қонақтары былғары қолғап шеберлерінің жаттығуын тамашалады. Толығырақ әріптесім Темірлан Нұржанұлың бейнематериалында.
Темірлан Нұржанұлы, тілші:
Астанада өтетін күллі бокссүйер қауым күтіп жүрген кәсіпқой бокс кешіне санаулы күндер қалды. Соның қарсаңында бүгін боксшылар жиналған жұрт алдында жаттығу өткізіп жатыр.
Берік Сұлтан, Жәнібек Әлімханұлының PR-директоры:
Жекпе-жек алдындағы дайындығын, формасын елге бір көрсету үшін осындай ашық жаттығу ұйымдастырылып отыр. Өйткені үлкен кәсіпқой бокс кештерінде осындай шара жасалуы заңдылық. Сондықтан жанкүйерлерді біз көріп алдық, жанкүйерлер бізді көріп алды.
Темірлан Нұржанұлы, тілші:
2001 жылы Василий Жиров алғаш рет Алматы қаласында IBF титулын қорғаған еді. Ал бұл жолы тек бір емес, екі бірдей белбеу сарапқа салынады. Жәнібек Әлімханұлы IBF және WBO тұжырымдалары бойынша чемпиондығын өз елінде қорғайды. Бұл бұрын-соңды Тәуелсіз Қазақстан тарихында болмаған оқиға.
Эйден Берли, «Nomad Promotion» негізін қалаушыларының бірі:
Бұл - халыққа боксшылардың талантын көрсету үшін арнайы ұйымдастырылған жаттығу. Жуырда өтетін кәсіпқой бокс кеші – тарихи сәт. Шаршы алаңға алтын медаль иегерлері, кәсіпқой бокста дебют жасағалы жатқан жас жұлдыздар шығады. Билетті онлайн сатып аларда «THANKYOU25» промокодын енгізіп, 25 пайыз жеңілдік алуға болады. Бұл - боксшылардың алғысы. Жанкүйерлерге боксшылардың өнерін өз көзімен тамашалауға мейлінше мүмкіндік жасағымыз келеді.
Темірлан Нұржанұлы, тілші:
Алдағы күндері боксшылар баспасөз конференциясына қатысып, салмақ өлшейді. Ал 5 сәуір күні «Барыс Арена» спорт кешеніндегі шаршы алаңда жұдырықтасады. Көктемнің басты кәсіпқой бокс кешін «Qazaqstan» және «Qazsport» телеарналары тікелей эфирде көрсетеді.
Темірлан Нұржанұлы
