Жаңалықтарды Telegram арнамыздан оқыңыз!Көктем туды дегенше бірден су тасқынын ойлайтын болдық. Қауіп бар. Былтыр сабақ алатындай, қорытынды шығаратындай, барынша тас-түйін отыратындай су басып, апат болды.
Сол кезде «енді мынша бөгет салынады, өзен-көлдер жағасы нығайтылады, қорғандар тұрғызылады, тіпті қалың қарды тиімді пайдалану керек» деген салиқалы әңгіме айтылды.
Орындалды ма? Не істелді? Төтенше жағдайлар министрі Шыңғыс Әріновтің есебінше, цитата:
«Елдімекендерді қорғау үшін 576 шақырым қорғаныс бөгеттері тұрғызылды. 164 шақырым арық жүйелері жөнделіп, салынды. Автомобиль және темір жол өткелдерінің астынан 960 су өткізетін арықтар қазылған. 74 өзеннің қауіпті учаскелерінде 300 шақырымнан астам тереңдету және жағалауды нығайту жұмыстары жүргізілді».
Су тасқыны қаупін 7 күн бұрын болжайтын «Tasqyn» жүйесі қосылыпты. Жалпы еліміздің 1223 елдімекені су басу қаупі бар аймақта орналасқан.
Ақтөбе облысында былтырғы су тасқынынан зардап шеккен шаруалар әлі күнге дейін өтемақысын ала алмай жүр деп хабарлады меншікті тілшіміз. Тек Ойыл ауданының өзінде 53 қожалық бар екен. Олардың үйлері мен қораларын айналдырған екі сағаттың ішінде су ағызып әкеткен. Негізі барлық дерлік жерде солай болды.
Сөйтіп өтемақы алмағасын шауалардың көбі қора да сала алмаған. Ал облыс әкімдігі құжаттар кеш рәсімделді, республикалық бюджеттен қаржы бөлінуін күтіп отырмыз деген. Бұл шаруалардың өтемақысы төленер.
Биылғы дайындық алаңдатады. Қазіргі бюджеттің жайын ескерсек, су тасқынының барынша алдын алу керектігі, барынша дайын болу қажеттігі айқын дүние. Әйтеуір қарапайым адамдар оны түсінеді. Үкімет те түйсінетін шығар. Амангелді Сейітхан таразылайды.
