Жаңалықтарды Telegram арнамыздан оқыңыз!Тыңдарман ақысын төлеген соң әнді жанды дауыспен тыңдауға құқылы. Мәжіліс депутаттары елімізде фонограммаға тоқтау болмай тұр деп те шағымданды. Бұған дейін бұл мәселе бірнеше мәрте талқыға түсіп, қолданыстағы заңға өзгерістер енгізу ұсынылған еді. Оған сай тек концерт залы техникалық құралдармен толық қамтамасыз етілмесе ғана аудиторияны хабардар ете отырып, фонограмманы пайдалануға рұқсат беру көзделген еді. Бірақ заң жобасы қолдау таппады.
Мақсат Толықбай, ҚР Парламенті Мәжілісінің депутаты:
Бір әншінің әнін тыңдағым келсе, ютубтан да тыңдай аламын. Дискісін сатып алып, оны көлігімде тыңдай аламын. Бірақ оны көрермен ақшасын төлеп, концертке барып отырғаннан кейін неге ол фонаграммамен тыңдауға тиіс?
Айбек Сыдықов, ҚР Мәдениет және ақпарат вице-министрі:
Заңға тәуелді актіде бізде ереже қарастырылған. Фонаграмманы алдын ала ескерту туралы ереже. Бірақ бұл жұмыс істемей тұр. Оны барлығымыз тәжірибеде көріп отырмыз. Содан кейін осы норманы заңнамалық акті ретінде ұсыну осы депутаттардан болды. Біз оны қолдаймыз. Егер ол заңға енгізілетін болса, жұмыс істейді деп сенеміз.
Әншілер әлеуметтік желіден жүктелген әр әні үшін ақша алады
Ал Мәдениет және ақпарат вице-министрі әлеуметтік желіден жоғалып кеткен қазақ әндерін қайтарудың жолын ұсынды. Енді елімізде сайттардан жүктелген ән үшін әншілерге ақша түсе бастайды. Оны реттейтін арнайы ақпараттық жүйе жыл соңына дейін жасалмақ. Еске салайық, былтыр күзде қазақ әншілерінің музыкасы Meta платформаларынан жойылып кеткен еді. «Қазақстан авторлық қоғамы» оған компаниямен келісімшарттың аяқталғаны және созу кезінде қазақстандық авторларға ақы төлеу мәселесі бойынша ортақ келісімге келе алмағаны себеп болды деп түсіндірген еді.
Нұрсұлтан Тілектес
