Жаңалықтарды Telegram арнамыздан оқыңыз!Осы аптада Қытайда өткен «Бір белдеу, бір жол» форумы әлем назарына іліккен айтулы оқиғалардың бірі болды. Бұл бастама өз жұмысын он жыл бұрын бастады. Нәтижесінде триллион долларға жолдар, теміржолдар, порттар, электр станциялары салынды.
Қытайдың «Синьхуа» агенттігінің хабарлауынша, форум барысында Қазақстан президенті Қасым-Жомарт Тоқаев Қытай премьерімен кездесті. Бұл туралы мақалада тараптар арасындағы консенсустардың екіжақты қатынастардың келесі «30 алтын жылына» негіз болатыны айтылған.
Мерейтойлық жиын Американың «Associated Press» агенттігінің назарынан да тыс қалған жоқ. Оның дерегінше, Қытай дүниеге өз нарығын ашып, «Бір белдеу, бір жол» жобаларына миллиардтаған доллар инвестиция салуға уәде беріп отыр.
Ал «Reuters» Қытай төрағасы Си Цзиньпиннің Қазақстан президентімен кездесуіне материал арнаған. Халықаралық жаңалықтар агенттігінің хабарлауынша, Астана мен Бейжіңнің тұрақты әрі қарқынды байланыстары екі елдің дамуына ықпал етіп отыр.
Әзербайжанның «Trend» жаңалықтар агенттігі де форумға қатысты мақала жариялады. Материалда Қазақстан президентінің Транскаспий халықаралық көлік бағдарына қатысты айтқан сөзі келтірілген. Қасым-Жомарт Тоқаев бұл дәліз Қытайды, Орталық Азияны және Еуропаны байланыстыратын «Бір белдеу, бір жол» бастамасының құрлықтағы көпіріне айнала алады деп мәлімдеген еді.
Арыстан Рысбек
