Жаңалықтарды Telegram арнамыздан оқыңыз!Қонаев қаласының тұрғындарына маса маза бермей жатыр. Қансорғыштардың кесірінен жұрт кешкілік көшеге шығудан қалған. Дененің ашық жерлеріне арнайы крем жағып амалдап отыр. Улау жұмыстары жүргізілгенімен, азаяр түрі жоқ.
Білмеймін биыл масаның жылы ма күндіз де, кешке де балалар түгел қып-қызыл болып кетеді. Тұрғындар сондай қиналып жатыр масадан.
Маса қатты көп. Кешке қарай баламен серуендеп шыға алмайсың. Үйдің қасында, жертөледе жүре алмайсың. Подъездің ішінде әсіресе қаптап кеткен.
Қонаев қаласының тұрғындары маса биыл ерекше көбейіп кеткенін айтады. Аяулым Кенжеханқызы күндіз ыстықтан, түнде масаның кесірінен сыртқа шыға алмай қалдық дейді. Ол аздай баласының денесінде зиянкестен бөртпе пайда болған.
Аяулым Кенжеханқызы, Қонаев қаласының тұрғыны:
Баланың үстін шағып тастады. Түнімен жылап шығады. Масалар өте көп. Үйдің ішінде де бар. Далаға шықсақ та.
Бұл мәселеге қатысты санитар дәрігерлер масаны улау жұмыстары жүріп жатқанын айтты. Қазір қаланың айналасын, әсіресе, қамысты алқаптарды дәрілеп жатыр дейді. Жалпы Қонаев маңында 46 су тоғаны бар. Ондағы қансорғыштарды жою мақсатында 60 гектар аумаққа дезинфекция жұмыстары жүргізілген.
Лариса Радугина, Қонаев қаласының санитарлық- эпидемиологиялық қадағалау бөлімінің басшысы:
Безгек ауруының алдын алу мақсатында біз 16 мамырдан бастап масаларды улауды бастадық. 1 айдан соң екінші кезеңі өтті. Енді әсер ете бастайды. Қалада көл болғандықтан,әрі биыл жауын-шашын көп жауғандықтан, масаның қаптағаны заңды. Олармен күреске қолданатын дезинфекциялық заттар жеткілікті.
Тұрғындар масаның ордасы көл аумағында ғана емес, көпқабатты үйлердің жертөлесінде де көп екенін айтып отыр. Себебі, іші суға толып қалған. Кешенді жұмыс жүргізілуі тиіс дейді.
Марғұлан Жолдахмет, Қонаев қаласы әкімінің орынбасары:
Көп қабатты үйлерде КСК-ның тұрғылықты адамдардың есебінен жүргізілетін жұмыстар. Қала бойынша жұмыстар өткізілген. Бірақ қазіргі уақытта бюджеттен ешқандай қаражат бөлінбеген.
Дезинфекция жұмыстарын жүргізетін қызмет түріне күніне 10 шақты тұрғын көмек сұрап хабарласады. Компания өкілі ауқымды жұмыс қолға алынбай, жеке тұрғын үйлерді, аулаларды улау нәтиже бермейді деп отыр. Сондықтан масадан мазасы қашқан тұрғындар әкімдіктен кешенді дезинфекция жүргізілуін талап етеміз деп отыр.
Қуан Нұрақын
