Ресеймен шекаралас ауылда 100-ге жуық тауық қырылып қалды

Қостанай облысында Ресеймен арадағы шекараға жақын Ленино ауылында 100-ге жуық тауық өлген. Алдымен бір түнде бір үйдің 20 құсы қырылып қалыпты. Келесі күні тағы бір үйде 50 тауық өлген. Кесел әлі тоқтамай тұр. Тұрғындар ауылда мүлде тауық қалмауға таяғанын айтады.

Дәл осы Федоров ауданында сәуірде жүз тауық өлген. Бірақ иелері өлексені бірден өртеп жібергендіктен сынама алып, қандай індет келгенін анықтау мүмкін болмаған. Мұндай жағдай бұған дейін Қарабалық, Денисов аудандарында да болды. Сол кезде жасалған сараптама ешқандай індет белгілерін анықтамаған. Ветеринарлар ол кезде құс жемнен уланған деген болжам айтқан болатын.