Атырауда 106 айыппұлы бар шетелдік көлік анықталды

Атырауда 106 айыппұлы бар Грузия елінде тіркелген автокөлік анықталды.

Қала көшелерінде жүйткіп жүрген Toyota Highlander маркалы темір тұлпарды полицейлер анықтады. Тексере келе 3 млн теңгеге жуық төленбеген берешегі барын біледі. Сонымен қатар сақтандыруы да жоқ болып шықты. Хаттама толтырылып, қарызға батқан көлік арнаулы тұраққа қойылды. Иесі оны 2-3 күн бұрын сатып алғанын және айыппұлы барын білмейтінін жеткізді.

Бұған қоса инспекторлар соңғы 1 аптада мас күйінде көлік басқарған 20 жүргізушіні анықтап, оларды 7 жыл мерзімге көлік жүргізу құқығынан айырды.