Әлем чемпионы Карина Сисеноваға ауылдастары ат мінгізді

Жастар арасындағы аралас жекпе-жектен Әлем чемпионатында «алтын» алқа таққан батысқазақстандық Карина Сисеноваға ауылдастары ат мінгізді. 19 жастағы спортшы Әбу-Даби қаласында өткен ММА-ден әлем біріншілігінде ел намысын қорғап, жеңіспен оралды. Жалпы чемпионатқа елімізден 42 спортшы қатысып, 2 алтын, 4 күміс, 6 қола иеленді. Ел қоржынына түскен екі алтынның бірін жеңіп алған чемпионға жерлестері зор қошемет көрсетті. Карина Сисенова - аралас жекпе-жек, грэпплинг спортының бірнеше рет облыстық және ел біріншілігінің қос дүркін чемпионы, Әлем чемпионатының күміс жүлдегері, Еуропа чемпионатының қола жүлдегері. Жас спортшы енді жоғары оқу орнында білімін жетілдіріп, тәжірибесін шыңдамақ.

Ардақ Мұратқызы